Partia Demokratike e Kosovës ka lëshuar të enjten një deklaratë për media, nëpërmjet se cilës ka shprehur reagimin e saj ndaj kërcënimin që i është bërë zv/ministrit të MTPT-së, Adem Grabovci, nga ana e kryetarit të Deçanit, Musa Berisha.
Sidoqoftë, në deklaratën e PDK-së, thuhet: “Është e dhimbshme që një zyrtar i lartë i AAK-së kërcënon me vdekje një zyrtar të lartë të Qeverisë së Republikës së Kosovës. Kjo ndikon keq në imazhin e Kosovës në botë dhe është e papranueshme për të gjithë qytetarët e Kosovës”.
Në demokraci – siç theksohet në deklaratën e PDK-së – nuk ka vend për sjellje të tillë. “Ramushi duhet ta dijë se zgjedhjet fitohen me vota, jo me plumba! Vullneti i qytetarëve të Kosovës është suprem në Kosovë dhe jo armët e kërcënimet”, thuhet më tej në deklaratë.
“Ramushi e di se akuzat qe bëri dje nuk janë të vërteta. Ai e di se vetëm po mundohej që të krijonte lajme, por megjithatë ai e inkurajoi një zyrtar të partisë së tij që të bëjë kërcënim me vdekje. Kjo është e dhimbshme dhe shqetësuese”, përfundon deklarata e PDK-së – ku theksohet se, “organet e rendit po e hetojnë këtë kërcënim dhe ne kemi besim së ata do t’i kryejnë detyrat e tyre me përgjegjësi”.