Ministri i Punëve të Jashtme i Kosovës, Skender Hyseni ka udhëtuar drejt New Yorkut, ndërsa qëllimi ekskluziv i kësaj vizite është lobimi për njohjen e shtetit të Kosovës.
Gjatë qëndrimit në New York – siç bëhet e ditur në një komunikatë të Ministrisë së Punëve të Jashtme - Hyseni do të ketë takime me rreth 30 delegacione nga vende që ende nuk e kanë njohur Kosovën, e që janë të akredituar në Organizatën e Kombeve të Bashkuara në New York.
Gjatë këtyre takimeve, ministri Hyseni do të flasë për progresin e Kosovës në vitin e parë të pavarësisë si dhe do të kërkojë që qeveritë e këtyre vendeve ta kenë në agjendën e tyre njohjen e Kosovës e ta përshpejtojnë këtë hap, përfundon komunikata.
Forum 